लामो समयदेखि रामेछापमा औषधि अभाव

, रामेछाप

पुस १९, २०७३- मागबमोजिम औषधि उत्पादक कम्पनीले आपूर्ति गर्न नसक्दा रामेछापमा नागरिकले नि:शुल्क पाउने औषधिको अभाव चुलिएको छ । जिल्लाका दर्जनौं स्वास्थ्य संस्थामा सामान्य सिटामोल र रोग प्रतिरोधात्मक एन्टिवायोटिक औषधिहरु पाइन छाडेको छ ।

पुरानागाउँ स्वास्थ्य चौकीमा आँखा र ग्याष्टिकका लागि औषधि सकिएको डेढ महिना भयो । ‘धेरै बिरामी ग्याष्टिककै आउँछन्’ चौकीका प्रमुख राजकुमार आरण भन्छन्– त्यही औषधिचाहिँ चलाउन पाइएको छैन । आँखाको समस्या पनि उत्तिकै आउने गरेको उनले सुनाए । धेरै बिरामी आउने स्वास्थ्य चौकीमा पर्ने पुरानागाउँमा औषधि सकिएपछि कम बिरामी हुने चिसापानी र पिङ्खुरी गाविसमा रहेका स्वास्थ्य संस्थाको औषधि लगेर आरणले काम चलाए । त्यसरी लगिएको औषधि पनि केही दिन अघिबाट सकियो । ‘जिल्ला स्वास्थ्यको गोदाममा म आफैं पुगेर हेरे त्यहाँ पनि छैन’ उनले दुखेसो पोखे ।
 
बिरामीको संख्या न्यून हुने गाविसमा भने औषधिको अभाव त्यति भइसकेको छैन । भूकम्प अतिप्रभावित दुरागाउँमा अझै डेढ महिनालाई पुग्ने औषधि रहेको स्वास्थ्य चौकी प्रमुख गौरीशंकर ठाकुरले बताए ।
 
जिल्ला स्वास्थ्य कार्यालय रामेछापका प्रमुख डा. प्रकाशकुमार शाहका अनुसार गएको तीन महिना अघिनै औषधि खरिदका लागि टेण्डर भएको थियो । टेण्डर भएकोमध्ये अधिकांश औषधि जिल्लाको स्टोरमा आइसकेको छ । तर केही औषधि बजारमा उपलब्ध नभएका कारण आपूर्ति हुनसकेको छैन । पुरै औषधि नआइ स्टोर दाखिला र वितरण गर्न उपकरणका  कारण सकिँदैन । स्वास्थ्यले प्रयोग गर्ने उपकरण एकै औषधिको पटक पटक दाखिलामैत्री छैन ।

टेण्डर गरिएको औषधिमध्ये अलिकति पनि पाइएको छैन भने केही कम परिमाणमा आएको छ । साहका अनुसार टेण्डरमा ३ लाख ट्यावलेट सिटामोल मागिएकोमा हाल १ लाख मात्र जिल्लामा आएको छ । आएको सिटामोल समेत वितरण गर्न सकिएको छैन । औषधि आपूर्ति गर्ने समय बाँकी नै रहेकोले तोकिएको अवधिमा अरु औषधि आइपुग्ने आशामा जिल्ला स्वास्थ्य कार्यालय रहेको छ । धेरै जिल्लाले प्राय: एकै समयमा टेण्डर गरेकाले बजारमा औषधि अभाव सिर्जना भएको हो ।
 
नि:शुल्क वितरण हुने औषधिमध्ये जिल्लाले टेण्डर गरेको २० प्रतिशतका लागि मात्रै हो । ८० प्रतिशत औषधि स्वास्थ्यको केन्द्र र क्षेत्रीय कार्यालयले आपूर्ति गर्ने गर्छ । हरेक चौमासिकमा आपूर्ति गर्नुपर्ने औषधि ५ महिना बितिसक्दा पनि जिल्लामा आएको छैन । माथिल्लो निकायमा औषधि सकिएको कुरा जिल्ला स्वास्थ्य कार्यालयले जानकारी गराइसकेको छ ।

जिल्लामा औषधि आएपछि पनि सम्बन्धित स्वास्थ्य चौकीमा औषधि पुर्‍याउन केही दिन लाग्छ । केही गाविसमा अझै सडक सडक सुविधा नपुग्दा औषधि ढुवानी समस्या बन्दै आएको छ । जिल्लामा औषधि हुनासाथ अत्यावश्यक भएका स्वास्थ्यचौकीलाई जिल्ला स्वास्थ्यले आफ्नो र सार्वजनिक भाडाका साधन लगाएर भए पनि चाँडोभन्दा चाँडो औषधि आपूर्ति गर्ने जनाएको छ ।
   

प्रकाशित: पुस १९, २०७३

http://bit.ly/2hMqgQd